
މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ރައީސް ވަނީ، އާސަންދަ މިހާރު އޮންނަ ގޮތުން އެންމެ މުއްސަނދި މީހާއަށްވެސް އަދި އާދައިގެ މީހާއަށްވެސް އެ ނިޒާމުގެ ދަށުން އެއްވެސް ތަފާތެއް ނެތި ޚިދުމަތް ލިބޭކަން ފާހަގަކުރައްވާފައެވެ. އެހެންނަމަވެސް އެއީ އެންމެ ރަނގަޅު ގޮތްކަމަށް ކަމާއި ގުޅޭ ފަންނީ މާހިރުންވެސް ޤަބޫލުނުކުރައްވާކަމަށް ރައީސް ވިދާޅުވިއެވެ.
އެހެންކަމުން ކުރިއަށް އޮތް ދުވަސްތަކުގައި 60،000 ރުފިޔާއިން މަތިން މުސާރަ ލިބޭ ފަރާތްތަކަށް މިހާރު އޮންނަ ގޮތަށް ފުލް ކަވަރޭޖުގެ އާސަންދަ ނުލިބޭނެކަމަށް ރައީސް މުޢިއްޒު ވިދާޅުވިއެވެ.
"60،000 ރުފިޔާއިން މައްޗަށް މުސާރަ ލިބޭ ފަރާތްތަކުން ކޯޕޭ ނުވަތަ ޕްރީޕޭ ނިޒާމެއްގެ ތެރެއިން އާސަންދަ ލިބޭނެ. އޭގެ ސަބަބުން އަހަރު ދުވަހުގެ ތެރޭގައި 287 މިލިއަން ރުފިޔާ ރައްޔިތުންގެ އެހެންކަންކަމަށް ޚަރަދުކުރަން ލިބޭނެ." ރައީސް މުޢިއްޒު ވިދާޅުވިއެވެ.
ފިނޭންސް މިނިސްޓްރީން އެންމެފަހުން އާއްމުކުރި ހިސާބުތައް ދައްކާގޮތުން، މިދިޔަ މަހު އާސަންދައަށް ކުރި ހަރަދު 13.5 އިންސައްތަ އިތުރުވެ 1.43 ބިލިއަން ރުފިޔާއަށް ވަނީ އަރާފައެވެ. މީރާގެ ޖުލައިމަހުގެ ހިސާބުތައް ދައްކާގޮތުން އާމްދަނީން ނަގާ ޓެކުހުގެ ގޮތުގައި 799 މިލިޔަން ރުފިޔާ ވަނީ ލިބިފަ އެވެ.




