އުފެއްދުންތެރިކަމުގެ މައުރަޒުގެ ވަނަތައް ހާސިލުކުރި ފަރާތްތަކަށް އިނާމު ހަވާލުކުރުމަށް ބޭއްވި ރަސްމިއްޔާތުގައި މިނިސްޓަރ ސައީދު ވާހަކަދައްކަވަނީ.-- ފޮޓޯ: ރައީސް އޮފީސް
ރާއްޖޭގެ އިގުތިސާދުގައި އެންމެ އިސް ދައުރެއް އަދާކުރާނީ އުފެއްދުންތެރި ރައްޔިތުން
މި އަހަރުގެ އުފެއްދުންތެރިކަމުގެ މައުރަޒުގައި 600 ބައިވެރިންގެ 4400 އުފެއްދުން ފެނިގެންދާނެ: މިނިސްޓަރ ސައީދު
މަރްޔަމް މުޙައްމަދު 25 އޮކްޓޯބަރ 2026 (އާދީއްތަ)   06:28
ރާއްޖޭގެ އިގުތިސާދުގައި އެންމެ އިސް ދައުރެއް އަދާކުރާނީ އުފެއްދުންތެރި ރައްޔިތުން ކަމަށް އިކޮނޮމިކް މިނިސްޓަރ މުޙައްމަދު ސައީދު ވިދާޅުވެއްޖެ އެވެ.

މިނިސްޓަރ ސައީދު މިހެން ވިދާޅުވީ "މޯލްޑިވްސް އެކްސްޕޯ 2026" ގެ ވަނަތައް ހާސިލުކުރި ފަރާތްތަކަށް އިނާމު ދިނުމަށް ރޭ ބޭއްވި ހާއްސަ ރަސްމިއްޔާތުގައި ވާހަކަދައްކަވަމުންނެވެ. މި ރަސްމިއްޔާތުގައި އެކްސްޕޯގެ ބައިވެރިންގެ މަސައްކަތް ފާހަގަކުރައްވައި އެ ފަރާތްތަކަށް މަރުހަބާ ދަންނަވައި އިނާމުތައް ވަނީ ހަވާލުކޮށްފައެވެ.

މިނިސްޓަރ ވިދާޅުވީ އެންމެ ކުދި އަދި މެދު ފަންތީގެ ވިޔަފާރިތަކާއި، އަލަށް ވިޔަފާރި ފަށަން ބޭނުންވާ ފަރާތްތަކާއި ޒުވާނުންނަށް އަމާޒުކޮށް، 2030 ވަނަ އަހަރާ ހަމައަށް އަންނައިރު ރާއްޖޭގެ އިގުތިސާދުގެ 15 އިންސައްތައަކީ ކްރިއޭޓިވް އިކޮނޮމީ ކަމުގައި ހެދުމަކީ ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ ތަސައްވުރެއް ކަމަށެވެ.

ރާއްޖޭގެ އިގުތިސާދު އާ ހަރުފަތަކަށް ގެންދިއުމަށްޓަކައި ރައީސް މުއިއްޒު ގެންގުޅުއްވަނީ ހާއްސަ ތަސައްވުރެއްކަން ފާހަގަކުރައްވަމުން ސައީދު ވިދާޅުވީ، ދިމާވެފައިވާ ގޮންޖެހުންތަކާއެކުވެސް ގައުމު ކުރިއަށް ގެންދިއުމުގެ ސާފު މިސްރާބެއް ރައީސް ކަނޑައަޅުއްވާފައިވާ ކަމަށެވެ. އަދި ރާއްޖެއިންނާއި ބޭރުން ލިބެންހުރި ފުރުސަތުތައް ހޯދުމަށް ރެޔާއި ދުވާލު މަސައްކަތް ކުރުމަށް ރައީސް އިރުޝާދު ދެއްވާ ކަމަށްވެސް މިނިސްޓަރު ވިދާޅުވިއެވެ.

ވޭތުވެދިޔަ ދެ އަހަރަކީ އެންމެ ބޮޑެތި އިންވެސްޓްމެންޓުތަކުން ފެށިގެން އެންމެ ކުދި ވިޔަފާރިތަކާ ހަމައަށް ވަށާޖެހޭ ގޮތެއްގައި އިންވެސްޓްމެންޓް ހޯދުމަށް ގިނަ މަސައްކަތްތަކެއް ކުރެވި، ބޮޑެތި ކުރިއެރުންތަކެއް ހާސިލުކުރެވުނު ދުވަސްތަކެއް ކަންވެސް މިނިސްޓަރ ފާހަގަކުރެއްވި އެވެ.

ފާއިތުވި ދެ އަހަރުގެ މަސައްކަތްތަކަށް އަލިއަޅުއްވާލައްވަމުން ސައީދު ވިދާޅުވީ، ކުދި އަދި ބޮޑެތި ހުރިހާ ވިޔަފާރިތަކަށް ފައިދާވާނެ ގޮތަށް އިންވެސްޓްމެންޓުތައް ފަހިކޮށްދިނުމުގައި ސަރުކާރުން ބޮޑެތި ކާމިޔާބީތަކެއް ހޯދާފައިވާ ކަމަށެވެ.

your imageއުފެއްދުންތެރިކަމުގެ މައުރަޒުގެ ވަނަތައް ހާސިލުކުރި ފަރާތްތަކަށް ރައީސުލްޖުމްހޫރިއްޔާ އިނާމު ހަވާލުކުރެއްވުމުގެ ތެރެއިން.-- ފޮޓޯ: ރައީސް އޮފީސް 

މިއަހަރުގެ ދިވެހި އުފެއްދުންތެރިކަމުގެ މައުރަޒަކީ މިހާތަނަށް ވަރަށް ފުޅާ ދާއިރާއެއްގައި ބޭއްވޭ މައުރަޒެއްކަން ހާމަކުރައްވަމުން މިނިސްޓަރު ވިދާޅުވީ، މިދިޔަ އަހަރު 240 ފަރާތަކުން ބައިވެރިވި މި މައުރަޒުގައި މިއަހަރު 600 ފަރާތަކުން ބައިވެރިވެފައިވާ ކަމަށެވެ. އަދި މައުރަޒަށް ހުށަހެޅި އުފެއްދުންތަކުގެ އަދަދު 4،400 އަށް އަރާފައިވާއިރު، މައުރަޒު އިންތިޒާމުކުރި ޑިސްޓްރިކްޓްތަކުގެ އަދަދު ފަހަކުން ހަތަކަށް އިތުރުކުރެވިފައިވާ ކަމަށްވެސް ވިދާޅުވިއެވެ.

މީގެއިތުރުން، އަލަށް ތައާރަފުކުރި ދެ ޑިސްޓްރިކްޓާ ގުޅޭގޮތުން ވާހަކަދައްކަވަމުން ސައީދު ފާހަގަކުރެއްވީ، "ވިޒިޓާ އިކޮނޮމީ ޑިސްޓްރިކްޓް" ގެ ސަބަބުން ފަތުރުވެރިކަމުގެ ދާއިރާގެ ކުދި އަދި މެދު ފަންތީގެ ވިޔަފާރިތަކަށް ބޮޑެތި ފުރުސަތުތަކެއް ހުޅުވި، އެ ދާއިރާއަށް އިންގިލާބީ ބަދަލެއް އަންނާނެ ކަމަށެވެ. ހަމައެއާއެކު "އިންޓަނޭޝަނަލް ޑިސްޓްރިކްޓް" ގެ ސަބަބުން ރާއްޖެއާއެކު މިނިވަން ވިޔަފާރީގެ އެއްބަސްވުން ހަދާފައިވާ އަދި ހަދަން މަސައްކަތްކުރާ ގައުމުތަކުގެ އުފެއްދުންތައް ފެނިގެންދާނެ ކަމަށާއި، މީގެ ސަބަބުން ދިވެހި ވިޔަފާރިވެރިންގެ އުފެއްދުންތައް ދުނިޔޭގެ އާ މާކެޓުތަކަށް ނެރުމުގެ މަގު ފަހިވެގެންދާނެ ކަމަށް މިނިސްޓަރު ވިދާޅުވިއެވެ.

"ވަރަށް އާދަޔާ ހިލާފު ޓެކްނޮލޮޖީ މިފަހަރުގެ އެކްސްޕޯ އިން އިންޓަނޭޝަނަލް އެގްޒިބިޓަރުންގެ ފަރާތުން ފެނިގެންދާނެ. ރާއްޖޭގެ އިންޑަސްޓްރީތަކަށް ވެލިއު އެޑްކުރެވިދާނެ އީޖާދީ އުކުޅުތައް، ޓޫލްސްތައް ފެނިގެންދާނެ. އެހެންވީމަ އެ ފަރާތްތަކާ ވެސް ގުޅުވަދެމުން މިދަނީ."

މިނިސްޓަރ ވިދާޅުވީ 2040 ވަނަ އަހަރާ ހަމައަށަ ދާއިރު ރާއްޖެއިން ބޭރުން ލިބޭ ބިނާކުރަނިވި ފައިދާތައް ރާއްޖެއަށް ގެނައުމަށް މަސައްކަތްކުރަމުން އަންނަ ކަމަށެވެ. އަދި ރައްޔިތުންގެ މުސްތަގުބަލާއި ފުއްދުންތެރިކަމަށް އެ މަސައްކަތް މި ސަރުކާރުން ކުރާނެ ކަމަށް ވެސް މިނިސްޓަރ ސައީދު ވިދާޅުވިއެވެ.

ކޮމެންޓް